- ट्रेण्डिङ:
काठमाडौं । मनाङमा शनिबार ट्रक दुर्घटना हुँदा पाँचजनाको मृत्यु भएको छ भने सोही दुर्घटनामा चालकसहित तीन जना घाइते भएका छन्।
लम्जुङको सदरमुकाम बेँसिशहरबाट सिमेन्ट बोकेर मनाङ जाँदै गरेको ट्रक नासो गाउँपालिकामाको खोत्रोपाखा भन्ने स्थानमा दुर्घटना हुँदा तीनजनाको घट्नास्थलमै र दुईको अस्पतालमामृत्यु भएको जिल्ला प्रहरी कार्यालय मनाङका प्रमुख प्रहरी नायव उपरीक्षक शुवास खड्काले जानकारी दिए।
प्रनाउ खड्काका अनुसार दुर्घटनामा परी नासो गाउँपालिका ओढारगाउँका ३५ वर्षीय डोलकासी गुरुङ, अन्दाजी ३४ र ३५ वर्षका मनिषा गुरुङ र ६ वर्षीय बालक पियुष गुरुङको घट्नास्थलमै र ट्रकका सहचालक लम्जुङ मर्स्याङदी–५ का २१ वर्षीय लक्ष्मी नेपाली र मनाङ चामे–४ का २७ वर्षीय राजु विकको लम्जुङ जिल्ला अस्पतालमा उपचारका क्रममा मृत्यु भएको हो।
दुर्घटनामा घाइते भएका ट्रकका चालक तनहुँ भानु नगरपालिका–३ का २४ वर्षीय सुमन तमाङ र अन्य दुई बालिका घाइते छन्। चालक तमाङको लम्जुङमै उपचार भइरहेको र गम्भीर घाइते दुवै बालिकालाई थप उपचारका लागि भक्तपुर रेफर गरिएको प्रहरीले जनाएको छ। उकालो बाटोमा मालवहाक ट्रक ब्रेकफेल भएर पछाडितर्फ करिब डेढसय मिटर तल खोलामा खसेको प्रहरीले जनाएको छ।
