- ट्रेण्डिङ:
खोटाङ । खोटाङको साकेला गाउँपालिकालाई थप हप्ता दिनका लागि शिल गरिएको छ । कोभिड–१९ को संक्रमण दर तिब्र गतिमा बढिरहेको भन्दै पुन: आइतबारदेखि लागू हुनेगरी थप हप्ता दिनका लागि पूर्णरुपमा शिल गरिएको गाउँपालिकाले जनाएको छ ।
कोभिड–१९ को संक्रमण दर तिब्र गतिमा फैलिरहेको पाइएकाले गाउँपालिकाभित्र आवत–जावत गर्न नपाउने गरी गाउँपालिका पूर्णरुपमा सिल गरिएको प्रमुख प्रशासकीय अधिकृत रबिन मगरले बताए । शिल गरिएसँगै साकेला गाउँपालिकामा पालिका प्रवेश गर्न र बाहिरिनमा कडाई गरिएको छ ।
गाउँपालिकाका अध्यक्ष अर्जुनकुमार खड्काले जारी गरेको सूचनामा आइतबारदेखि नै आफ्नो कार्यालयको आन्तरिक, प्रशासनिक कामकाज र अत्यावश्यक सेवा बाहेक अन्य सेवा प्रवाह बन्द गरिएको जनाइएको छ ।
यस अघिको हप्ता दिन कार्यालयबाट अघोषित रुपमा सेवा प्रवाहलाई बन्द गरिएकामा आइतबारदेखि भने घोषणा गरेरै अत्यावश्यक बाहेकका सेवा बन्द गरिएको प्रमुख प्रशासकीय अधिकृत मगरले बताए ।
गाउँपालिकाले यस अवधिमा पालिकाभित्र भिडभाडका बिचमा हुने भोजभतेर, समिक्षा, गोष्ठी, तालिम नगर्न/नगराउन अनुरोध गरेको छ । कोभिड–१९ बाट संक्रमित भेटिएपछि कोभिड संकट व्यवस्थापन समितिको गत बैशाख २५ गते बसेको बैठकको निर्णय अनुसार हप्ता दिनका लागि गाउँपालिकालाई शिल गरिएको थियो ।
