- ट्रेण्डिङ:
खोटाङ । दिनानुदिन कोरोना भाइरसको जोखिम बढिरहेका बेला खोटाङमा ‘तपाईको मास्क खै ?’ अभियानलाई जारी राखिएकोे छ । लकडाउन हटेपछि मास्कको प्रयोगमा बेवास्ता गर्दा कोरोना संक्रमण फैलिने त्रास झन् बढेर गएको भन्दै दिक्तेल रुपाकोट मझुवागढी नगरपालिका, जिल्ला प्रशासन कार्यालय, जिल्ला प्रहरी कार्यालय, नेपाल रेडक्रस सोसाइटी र खोटाङ उद्योग वाणिज्य संघले ‘तपाईको मास्क खै ?’ अभियान जारी राखेका हुन् ।
अभियानमा निस्किएको टोलीले मास्क नलगाएका स्थानीयलाई मास्क वितरण गर्दै नियमित मास्क लगाउनका लागि आग्रह गरेका थिए ।
यस्तै, मास्क बोकेका तर नलगाएका वा मास्क लगाएपनि च्यापुमा अड्याएका स्थानीयलाई समेत सही ठाउँमा मास्क लगाउन सल्लाह दिएका थिए । संयुक्त अभियानलाई निरन्तरता दिइने प्रमुख जिल्ला अधिकारी शालिग्राम शर्मा पौडेलले बताए ।
र्यालीमा निस्किएको टोलीले शनिवार जिल्ला समन्वय समितिदेखि रत्नपार्क (किरातचोक) सम्म र्याली सहित स्थानीयलाई सन्देशमूलक पर्चा तथा मास्क वितरण गरेको जनाएको छ ।
