- ट्रेण्डिङ:
खोटाङ, २८ माघ । खोटाङको ऐसेलुखर्क गाउँपालिकाले १० विद्यालयलाई प्रारम्भिक वालविकास केन्द्रको कोटा उपलव्ध गराउने निर्णय गरेको छ । गाउँपालिकाका ४३ विद्यालयमध्ये हालसम्म प्रारम्भिक वालविकास केन्द्र नभएका १० विद्यालयमा प्रारम्भिक वालविकास केन्द्रका शिक्षक नियुक्तीका लागि कोटा उपलव्ध गराउने निर्णय गरेको हो ।
गाउँ कार्यापालिकाको बैठकको निर्णय अनुसार मासिक १५ हजार पाउनेगरी प्रारम्भिक वालविकास केन्द्रका शिक्षक नियुक्तीका लागि १५ दिने विज्ञापन आव्हान गरिएको गाउँपालिका अध्यक्ष बिश्वनाथ निरौलाले बताए । प्रारम्भिक वालविकास केन्द्रका शिक्षक नियुक्ती लगत्तै १० विद्यालयमा प्रारम्भिक वालविकास केन्द्रको पठन–पाठन सुरु हुने गाउँपालिकाले जनाएको छ ।
गाउँपालिकाले आफ्नो क्षेत्रभित्रका ८ माविमा कार्यरत सहायक कर्मचारी र कार्यालय सहयोगीको तलव वृद्धि गरेको छ । मासिक १५ हजार पाउँदै आएका सहायक कर्मचारीको तलवमा मासिक ३ हजार र मासिक १५ हजार पाउँदै आएका कार्यालय सहयोगीको तलवमा मासिक १ हजार ५०० ले वृद्धि गरिएको हो ।
कार्यबोझका आधारमा गत १ साउनदेखि लागू हुनेगरी माविमा कार्यरत सहायक कर्मचारी र कार्यालय सहयोगीको तलव वृद्धि गरिएको गाउँपालिका अध्यक्ष निरौलाले बताए ।
यस्तै, गाउँपालिकाभरीका ४३ वटै विद्यालयका प्रअलाई मासिक ५०० का दरले सञ्चार खर्च उपलव्ध गराउने निर्णय गरिएको गाउँपालिकाले जनाएको छ । प्रअले गत १ साउनदेखि लागू हुनेगरी सञ्चार खर्च पाउने छन् ।
