- ट्रेण्डिङ:
खोटाङ । टिपरले मोटरसाइकललाई ठक्कर दिँदा मोटरसाइलमा सवार हलेसी तुवाचुङ नगरपालिका–६ मङ्गलटारस्थित देविटारका २५ वर्षीय टंकल राईको मृत्यु भएको छ ।
दिक्तेलबाट हलेसीतर्फ जाँदै गरेको बागमती प्रदेश ०१७–००६ ख २४०२ नम्बरको टिपरले स ९ प १२१२ नम्बरको मोटरसाइकललाई आइतबार अर्खौलेको कामीडाँडामा ठक्कर दिँदा टंकलको घटनास्थलमै मृत्यु भएको हो ।
मोटरसाइकललाई ठक्कर दिने ट्रिपर र चालक पदम कार्कीलाई नियन्त्रणमा लिइएको जिल्ला प्रहरी कार्यालय खोटाङका सूचना अधिकारी प्रहरी निरीक्षक बेनु कार्कीले जानकारी दिए ।
दुर्घटनामा ज्यान गुमाएका टंकल मंगलटारबाट हलेसी हुँदै दिक्तेल जानेक्रममा दुर्घटनामा परेको बताइएको छ । दुर्घटनामा टंकलको मृत्यु भएपछि आफन्तहरुले दिक्तेल–हलेसी सडक अवरुद्ध गरेका छन् ।
घटनाको बारेमा सत्यतथ्य छानबिनगरी दोषीलाई कारबाही र मृतक परिवारलाई क्षतिपूर्तिको व्यवस्था गर्न माग गर्दै आफन्तले सडक अवरुद्ध गरेका हुन् ।
घटनाको विषयमा विस्तृत विवरण आउन बाँकी रहेको जिल्ला प्रहरी कार्यालय खोटाङका सूचना अधिकारी कार्कीले बताए ।
दुर्घटना लगत्तै इलाका प्रहरी कार्यालय हलेसीको टोली घटनास्थलमा पुगेको जनाइएको छ ।
