- ट्रेण्डिङ:
खोटाङ । चाडपर्व नजिकिँदै गर्दा खोटाङ जिल्ला प्रशासन कार्यालयले जिल्लावासीलाई मनोरञ्जनका नाममा जुवातास नखेल्न/नखेलाउन आग्रह गरेको छ ।
प्रमुख जिल्ला अधिकारी कल्पना श्रेष्ठले सात बुँदे सूचना जारी गर्दै दसैँ, तिहार, नेपाल संवत् र छठलगायतका पर्वमा अनावश्यक गतिविधि नगर्न चेतावनी दिएकी हुन्।
सूचनामा दैनिक उपभोग्य सामग्रीमा कृत्रिम अभाव, कालोबजारी, मूल्यवृद्धि र म्याद नाघेका अखाद्यवस्तु बिक्रीजस्ता उपभोक्ताविरोधी कार्य नगर्न आग्रह गरिएको छ ।
त्यस्तै सार्वजनिक स्थलमा भिडभाड, झगडा नगर्न, सवारीसाधन क्षमताभन्दा बढी यात्रु नबोक्न, तोकिएको भाडाभन्दा बढी असुल नगर्न, मादकपदार्थ सेवन गरी सवारी नचलाउन तथा ट्राफिक नियमको पालना गर्न भनिएको छ ।
यात्रा गर्दा समस्या परेमा यात्रु सहायता कक्ष वा नजिकको प्रहरी एकाइमा सम्पर्क गर्न ९८५२८४९३२२ नम्बर उपलब्ध गराइएको छ ।
मनसुनी वर्षाका कारण बिग्रिएका सडक तत्काल मर्मत गर्न सम्बन्धित निकायलाई निर्देशन दिइएको छ ।
शङ्कास्पद गतिविधि देखिएमा प्रहरी एकाइ वा फोन नं १०० र ९८५२८४९३२२ मा खबर गर्न आग्रह गरिएको छ ।
तर प्रशासनको निर्देशन विपरीत जिल्लामा सञ्चालित सवारीसाधनले बढी भाडा असुल्ने गरेको यात्रुहरूको गुनासो छ ।
टिकट दिए पनि बढी पैसा लिने गरेका व्यवसायीहरूविरुद्ध प्रमाणसहित उजुरी परे आफैँ कारबाही गर्ने खोटाङ यातायात प्रालिका महासचिव रामकुमार हिङमाङले बताएका छन् ।
जिल्लामा करिब तीन हजार सवारीसाधन सञ्चालनमा रहेको ट्राफिक प्रहरी कार्यालयको तथ्याङ्कले देखाउँछ । मध्यपहाडी र सगरमाथा राजमार्गसँग जोडिएका सबै स्थानीय तह राष्ट्रिय सडक सञ्जालमा आबद्ध छन् ।
विसं २०६४ मा नेपाली सेनाको हेलिकप्टरमार्फत ल्याइएको सवारीले यातायात सेवा सुरु भएको खोटाङमा अहिले यातायात प्रयोगकर्ताको सङ्ख्या बढ्दो छ।
तर ग्रामीण सडकमा सञ्चालित धेरै सवारीसाधन अझै रुट परमिटविहीन छन् । कानुन अनुसार अनिवार्य रुट परमिट नभएका सवारी दुर्घटनामा यात्रुले क्षतिपूर्ति नपाउने प्रावधान रहेकाले प्रशासनले सचेत रहन आग्रह गरेको छ।
