- ट्रेण्डिङ:
खोटाङ १६ असार । कुनै समय रोजगारीको खोजीमा परिवार र जन्मथलो छाडेर कतार पुगेका निरकुमार श्रेष्ठ आज भने आफ्नै जिल्लामा अरूलाई रोजगारी दिने उद्यमी बनेका छन्। विदेशमा भोगेको कठिन अनुभवलाई पाठ बनाएर स्वदेश फर्किएका उनले अहिले सञ्चालन गरिरहेको ‘एनएस फर्निचर उद्योग’ खोटाङमा आत्मनिर्भरता र स्वदेशमै सम्भावना खोज्ने प्रेरणादायी उदाहरण बनेको छ।
खोटाङको दिक्तेल रुपाकोट मझुवागढी नगरपालिका–७ दोर्पा चिउरीडाँडामा जन्मिएका ४० वर्षीय श्रेष्ठ हाल दिक्तेलको भवनगैरामा बसोबास गर्दै आएका छन्। नेपालमै रोजगारीको अवसर नपाएपछि उनी २०६५ सालतिर वैदेशिक रोजगारीका लागि कतार पुगे।
उज्ज्वल भविष्यको सपना बोकेर कतार पुगेका श्रेष्ठले त्यहाँ डेढ वर्ष बिताए। तर विदेशको कठोर श्रम, परिवारबाट टाढा रहनुपरेको पीडा र संघर्षले उनलाई एउटा गहिरो निष्कर्षमा पुर्यायो—"अरूको देशमा पसिना बगाउनुभन्दा आफ्नै देशमा केही सिर्जना गर्नु धेरै अर्थपूर्ण हुन्छ।"
यही सोचका साथ उनी स्वदेश फर्किए र दिक्तेलमा फर्निचर व्यवसाय शुरु गरे। सुरुआती दिन सहज थिएनन्। सीमित पूँजी, बजारको प्रतिस्पर्धा र व्यवसाय स्थापित गर्ने चुनौतीका बीच उनले हार मानेनन्।
निरन्तर मेहनत, सीप र गुणस्तरीय उत्पादनप्रतिको प्रतिबद्धताले उनको व्यवसाय विस्तार हुँदै गयो। आज उनको ‘एनएस फर्निचर उद्योग’ ले पाँच जनालाई प्रत्यक्ष रोजगारी दिएको छ। विदेशमा रोजगारी खोज्नुपर्ने बाध्यता कम गर्न स्वदेशमै उद्यम गर्न सकिन्छ भन्ने सन्देश उनको यात्राले दिएको छ। श्रेष्ठको सफलतामा उनकी श्रीमती मुगा श्रेष्ठ साथ दिएकी छन्।
व्यवसाय सञ्चालनदेखि व्यवस्थापनसम्म उनले दिएको साथले उद्योगलाई अझ मजबुत बनाएको निरकुमार बताउँछन्। उनीहरू दुवैको अथक परिश्रमले एउटा सानो प्रयास आज सफल उद्यममा रूपान्तरण भएको छ।
उद्योगमा आधुनिक तथा आकर्षक डिजाइनका सोफा सेट, पलङ्ग, दराज, वाल दराज, टिभी क्याबिनेट, टेबललगायतका फर्निचर निर्माण गरिन्छ।
साथै, घर तथा कार्यालय निर्माणका लागि आवश्यक बुट्टादार झ्याल–ढोका, किचेन सेट तथा ग्राहकको अर्डरअनुसार विभिन्न डिजाइनका काठजन्य सामग्री पनि उत्पादन गरिन्छ। गुणस्तरीय सामग्री, आकर्षक डिजाइन र समयमै सेवा उपलब्ध गराउने भएकाले उद्योगमा उत्पादन गरिएका सामग्री जिल्लाभित्र मात्र होइन, अन्य ठाउँ पनि जाने गरेको छ।
निरकुमारको अनुभवले वैदेशिक रोजगारी नै सफलताको एकमात्र बाटो होइन भन्ने सन्देश दिन्छ। विदेशबाट फर्किएर आफ्नै माटोमा पसिना बगाउने हो भने सम्मानजनक आम्दानीसँगै अरूका लागि पनि रोजगारी सिर्जना गर्न सकिन्छ भन्ने जीवित उदाहरण उनी बनेका छन्।
स्वदेशमै अवसर खोज्ने युवाका लागि निरकुमारको यात्रा प्रेरणाको कथा बनेको छ। कतारको कठिनाइलाई सफल उद्यमशीलतामा रूपान्तरण गरेका उनले प्रमाणित गरेका छन्—सीप, दृढ इच्छाशक्ति र निरन्तर मेहनत भए आफ्नै गाउँ–ठाउँमै भविष्य निर्माण गर्न सकिन्छ।
