- ट्रेण्डिङ:
खोटाङ । खोटाङको हलेसी तुवाचुङ नगरपालिकाले हलेसी तुवाचुङ नगरपालिका–८ धितुङका किसानलाई बीउ तथा कृषि सामग्री वितरण गरेको छ ।
नगरपालिकाले जीविकोपार्जन सहयोग कार्यक्रम अन्तरगत स्वीस सरकार विकास सहयोग (एसडिसि) को सहयोगमा शनिबार धितुङका ३४५ घरपरिवार किसानलाई कृषि सामग्री तथा बीउ वितरण गरेको हो ।
विपन्न किसानलाई हलेसी तुवाचुङ नगरपालिकाका नगरप्रमुख इवन राई र उपप्रमुख बिमला राईले हिल ट्यांक, प्लाष्टिक टनेल, सिड–स्प्रे, हजारी र बीउविजन वितरण गरेका छन् ।
किसानलाई पानी संकलन गर्नका लागि हिल ट्यांक, तरकारी खेतीका लागि प्लाष्टिक टनेल लगायतका कृषि सामग्री प्रदान गरिएको हो ।
नगरपालिकाका ११ वडामध्ये कात्तिक २५ गते हलेसी तुवाचुङ नगरपालिका–१० अर्खौलेका ३२५ परिवार र मंसिर ४ गते हलेसी तुवाचुङ नगरपालिका–९ सल्लेका २१६ घर किसानलाई कृषि तथा बीउ विजन वितरण गरिएको थियो ।
कारितास नेपाल र नवकिरण सेवा समाज नेपालको सहजीकरणमा नगरपालिकाका १० रोपनीभन्दा कम जग्गा भएका किसानलाई कृषि सामग्री वितरण सुरु गरिएको नगरप्रमुख राईले बताए ।
गत वर्षको लामो खडेरीका कारण खाद्य संकट झेलेका किसानका लागि नगरपालिकाले राहत माग गरेको आधारमा एसडिसिले ४ हजार ५३ घर किसानलाई २ करोड ४४ लाख वरावरको कृषि सामग्री एबं बिउ उपलव्ध गराएको हो ।
