- ट्रेण्डिङ:
खोटाङ । खोटाङको हलेसी तुवाचुङ नगरपालिकाको आठौं हिउँदे नगरसभा सम्पन्न भएको छ । शुक्रबार हलेसीस्थित होटल जाम्बालामा भएको आठौं हिउँदे नगरसभामा उपप्रमुख बिमला राईले प्रस्तुत गरेको चालु आर्थिक वर्षको वित्तीय तथा भौतिक प्रगति विवरण अनुसार नगरपालिकाले चालु आवमा ३७ प्रतिशत वित्तीय प्रगति गरेको छ ।
नगरसभाले आर्थिक वर्ष २०७७/०७८ का लागि ५२ करोड ९९ लाख १३ हजार ६५२ रकम स्विकृत गरेकामा चालुतर्फ विनियोजन भएको ५ करोड ४२ लाख ५३ हजार ६६० मध्ये २ करोड ९० लाख ६६ हजार ८२२ रुपैयाँ खर्च भएको तथा पूँजीगततर्फ १७ करोड ८१ लाख ६० हजार ९९० रुपैयाँ विनियोजन भएकोमा ५ करोड ६३ लाख ४३ हजार ७४८ रुपैयाँ खर्च भएको छ । गत साउन १ गतेदेखि माघ मसान्तसम्मको अवधिमा चालुतर्फ ५३.४७ प्रतिशत र पूँजीगततर्फ ३१.६२ प्रतिशत वित्तीय प्रगति भएको उपप्रमुख राईले जानकारी दिएकी छन् ।
शिक्षा शाखाका लागि १९ करोड ९५ लाख विनियोजन भएकोमा ७ करोड ९६ लाख ७६ हजार ८६२ खर्च भएको, महिला तथा वालबालिका शाखाका लागि ५२ लाख बिनियोजन भएकोमा १ लाख ४० हजार ५२० खर्च भएको, स्वास्थ्य शाखाका लागि ५ करोड ७१ लाख विनियोजन भएकोमा २ करोड ७४ लाख ६५ हजार ५४० खर्च भएको, योजना शाखाका लागि १७ करोड ८१ लाख ६० हजार ९९० रुपैयाँ विनियोजन गरिएकोमा ५ करोड ६३ लाख ४३ हजार ७४८ खर्च भएको तथा युवा तथा खेलकुदका लागि विनियोजन गरिएको २० लाख विनियोजन गरिएकोमा ५ लाख ९४ हजार ६९० रुपैयाँ खर्च भएको नगरपालिकाले जनाएको छ ।
यस्तै, चालु आर्थिक वर्षको वित्तीय तथा भौतिक प्रगतिका विषयमा जानकारी दिनेक्रममा संघ र प्रदेशले सिलिङ अनुसार राजस्व बाँडफाँडतर्फको पैसा नपठाउँदा गत वर्ष अधुरो रहेका योजना पुरा गर्न ५ करोड ५९ लाख ८९ हजार आर्थिक दायित्व पूरा गर्नु परेको जानकारी दिएकी छन् ।
कोभिड–१९ को कारण देखाउँदै संघ र प्रदेशबाट सिलिङ अनुसारको बजेट नआउँदा आर्थिक वर्ष २०७६÷०७७ को अधुरा योजना सम्पन्न गर्नेगरी आर्थिक दायित्व निर्वाह गर्नुपर्ने बाध्यकारी अवस्था सिर्जना भएको नगरसभामा जानकारी दिइएको छ ।
उपप्रमुख राईले गत आर्थिक वर्ष सिलिङ अनुसारको बजेट नआउँदा अधुरो रहेका हलेसी तुवाचुङ नगरपालिका–१ बाहुनीडाँडाका ८ वटा, हलेसी तुवाचुङ नगरपालिका–२ डिकुवाका १२ वटा, हलेसी तुवाचुङ नगरपालिका–३ च्यास्मीटारका ७ वटा, हलेसी तुवाचुङ नगरपालिका–४ बडहरेका ५ वटा, हलेसी तुवाचुङ नगरपालिका–५ दुर्छिमका ४ वटा र हलेसी तुवाचुङ नगरपालिका–६ मंगलटारका १० वटा योजनालाई चालु आर्थिक वर्षको बजेटबाट पुरा गरिएको बताएकी छन् ।
यस्तै, हलेसी तुवाचुङ नगरपालिका–७ महादेवस्थानका ७ वटा, हलेसी तुवाचुङ नगरपालिका–८ धितुङका ९ वटा, हलेसी तुवाचुङ नगरपालिका–९ सल्लेका ४ वटा, हलेसी तुवाचुङ नगरपालिका–१० अर्खौैलेका ६ वटा र हलेसी तुवाचुङ नगरपालिका–११ राजापानीका ४ वटा योजनालाई चालु आर्थिक वर्ष बजेट विनियोजन गरेर पुरा गर्नु परेको जानकारी दिइएको छ ।
यस्तै, नगरस्तरीय २२ वटा अधुरा योजनालाई पनि पहिलो प्राथमिकतामा राखेर चालु आर्थिक वर्षको नगरसभाबाट बजेट बिनियोजन गरेर अघि बढाइएको छ । गत वर्ष प्रदेश र संघबाट सिलिङ अनुसारको बजेट नआएपछि नगरपालिकाको नगरसभाले अधुरा योजना पूरा गर्नका लागि ५ करोड ५९ लाख ८९ हजार विनियोजन गरेको थियो ।
विनियोजन भएका बजेटमध्ये हालसम्म ३ करोड ७६ लाख १७ हजार भुक्तानी भइसकेको र १ करोड ८३ लाख ७२ हजार मध्ये पुरानो भुक्तानी बाँकी रकम नगर समपुरक कोषमा थप गरी खर्च गर्ने नगरपालिकाले जनाएको छ ।
बजेट अभावमा अलपत्र र अधुरो रहेका गत वर्षको योजनालाई पूरा गर्नका लागि यस वर्ष प्राथमिकतामा राखिएको हलेसी तुवाचुङ नगरपालिकाका नगरप्रमुख इवन राईले बताए । ‘हामीलाई प्राप्त भएको सिलिङ अनुसार बजेट निर्माण गर्यौँ, योजना बनायौँ र सम्झौता गरेर काम अघि बढायौँ,’ नगरप्रमुख राईले भने, ‘तर तोकिएको बजेट नआएपछि धेरै योजना अधुरो रहन पुगे । त्यही अधुरो योजना पुरा गर्नका लागि हामीले चालु आर्थिक वर्षको बजेटबाट रकम व्यवस्था गरेर काम अघि बढाएका थियौँ ।’
नगरसभाले चालु आर्थिक वर्षको स्वीकृत ८ वटा योजनालाई औचित्यता, कारण र पुष्ट्याँई सहित संशोधन गरेको छ । ३ लाख ५० हजार विनियोजन गरिएको कालिका देवीथान धोद्रे खोला ग्रामीण सडक निर्माण योजनालाई संशोधन गर्दै गैरीगुठ तारेभीर हलेसी ग्रामीण सडक निर्माण योजना कायम गरिएको छ ।
१ लाख बिनियोजन गरिएको ताराखसे गैरीगाउँ आहाल तथा इन्टेक निर्माण योजनालाई संशोधन गर्दै उद्यमशिलताका लागि ड्राइभिङ तालिम कायम गरिएको जानकारी दिइएको छ । नगरसभामा नगरप्रमुख राईले प्रस्तुत गरेको नगरपालिकाको विषयगत शाखा तथा समग्र कार्यक्रमको वित्तीय र भौतिक प्रगति प्रतिबेदन तथा नगरप्रमुख राईले प्रस्तुत गरेको जरुरी सार्वजनिक महत्वको प्रस्तावलाई नगरसभाले पारित गरेको छ ।
