- ट्रेण्डिङ:
खोटाङ । खोटाङको हलेसी तुवाचुङ नगरपालिकाले कृषकलाई बीउबिजन तथ कृषि सामग्री वितरण गर्न थालेको छ । सुख्खा क्षेत्रका कृषकहरुको जीविकोपार्जनका लागि बीउबिजन तथा कृषि सामग्री वितरण थालेको हो ।
नगरपालिकाको विशेष अनुरोधमा एसडिसिको दुई करोड ४४ लाख वरावरको आर्थिक सहयोग तथा कारितास नेपाल र नवकिरण सेवा समाज नेपालको सहजिकरणमा मंगलबारदेखि अर्खौलेबाट बीउबिजन तथा सामग्री वितरण थालिएको छ ।
वितरणको पहिलो दिन अर्खौलेका कृषकहरुलाई हिलटेक, प्लाष्टिक टनेल, सिड स्प्रे, हजारी र बीउबिजन वितरण गरिएको छ । अर्खौलेमा ३२५ जना कृषकलाई बीउबिजन र कृषि सामग्री वितरण गरिनेछ ।
त्यहाँका कृषकहरुलाई प्रदेश १ का भूमि व्यवस्था कृषि तथा सहकारी राज्यमन्त्री रामबहादुर राना, प्रदेश नं. १ भूमि व्यवस्था कृषि तथा सहकारी मन्त्रालयकी सचिव निरु दाहाल पाण्डे, नगरप्रमुख इवन राई, उपप्रमुख विमला राई, महाशाखा प्रमुख राजेन्द्र उप्रेती, कृषि प्रसार अधिकृत अभिमन्यु अधिकारी लगायतले वितरण गरेका थिए ।
अब क्रमशः अन्य वडाहरुका कृषकलाई बीउबिजन तथा कृषि सामग्री हस्तान्तरण गरिदै लैजाने नगरप्रमुख इवन राईले बताए । राईका अनुसार ४ हजार ५३ घरपरिवारलाई बीउबिजन र कृषि सामगी वितरण गरिनेछ ।
बाहुनीडाँडामा ३९४, डिकुवामा ३८०, च्यास्मिटारमा ३९७, वडहरेमा २८८, दुर्छिममा ४५४, मंगलटारमा ३४०, महादेवस्थानमा ३३३, धितुङमा ३४५, सल्लेमा २१६ र राजापानीमा ५८१ जना कृषकलाई प्लाष्टिक टनेल, हजारी, हिलटेक, सिड स्प्रे तथा बीउबिजन सामग्री वितरण गरिनेछ ।
