- ट्रेण्डिङ:
खोटाङको इलाका प्रशासन कार्यालय खोटाङबजारबाट दैनिक सेवा प्रवाहको काम रोकिएपछि नेपाली कांग्रेस कोशी प्रदेशका महामन्त्री तथा प्रमुख सचेतक भुपेन्द्र राई गृह मन्त्रालयलाई ध्यानाकर्षण गराउन पुगेका छन् ।
कर्मचारी विहीन भएपछि तीन पालिकाका नागरिक सेवाबाट बञ्चित भएको भन्दै राई गृह मन्त्रालयमा ध्यानाकर्षण गराउन पुगेका हुन् । खोटेहाङ, जन्तेढुंगा र बराहपोखरी गाउँपालिकाका नागरिकले नागरिकता, आदिवासी, दलित, विपन्न लगायतका सिफारिस जस्ता सेवा इलाका प्रशासनबाट लिने गरेका थिए । उक्त सेवा कर्मचारी विहीन भएपछि लिनबाट बञ्चित भएका हुन् ।
दुई दिन लगाएर सेवा लिन आउने सेवाग्राहीले इलाका प्रशासनबाट सेवा लिन नपाएपछि पूनः दुई दिन लगाएर जिल्ला प्रशासन धाउनु परेपछि राई गृह मन्त्रालयलाई विहीबार ध्यानाकर्षण गराउन पुगेका हुन ।
यसरी सेवा इलाका प्रशासनबाट नपाएपछि कतिपय नागरिकले सरकार कहाँ छ ? भनी सामाजिक सञ्जालमासमेत प्रतिक्रिया लेखेका छन् । राईको ध्यानाकर्षणपछि गृह मन्त्रालयले साउन १४ गते आइतबारदेखि कर्मचारी व्यवस्थापन गरेर नियमित सेवा प्रवाह गर्ने जनाएको छ ।
