- ट्रेण्डिङ:
काठमाडौँ । नेपाली काँग्रेसका महामन्त्री डा. शशाङ्क कोइराला अस्पतालबाट ‘डिस्चार्ज’ भएका छन् । कोरोना सङ्क्रमण पुष्टि भएको केही दिनपछि सामान्य ज्वरो आएपछि गत मङ्गलबार ओम अस्पताल चावहिलमा भर्ना भएका मिहामन्त्री कोइरालाको स्वास्थ्यमा सुधार आएपछि आज शनिवार ‘डिस्चार्ज’ भएको कोइरालाका स्वकीय सचिव भरत तिवारीले जानकारी दिए ।
महामन्त्री कोइरालाले आफ्नो स्वास्थ्य अवस्थाबारे नियमित चासो, चिन्ता, शुभेच्छा र स्वास्थ्यलाभको कामना गर्नुहुने सम्पूर्ण पार्टीका नेता तथा कार्यकर्तालाई धन्यवाद दिएका छन् ।
यस्तै, आफ्नो स्वास्थ्य अवस्थाबारे आम जनतामाझ जानकारी गराउने पत्रकार तथा आफ्नो उपचारमा सङ्लग्न डा. विश्वनाथ कोइरालालगायत चिकित्सक टोलीलाई समेत धन्यवाद व्यक्त गरेका छन् ।
महामन्त्री कोइरालाले आफ्नो स्वास्थ्य स्थितिमा क्रमिक सुधार आएसँगै चिकित्सकको सल्लाह बमोजिम अब केही दिन होम आइसोलेसनमा रहने जानकारी समेत गराएका छन् ।
