- ट्रेण्डिङ:
खोटाङ, २ जेठ । खोटाङको हलेसी तुवाचुङ नगरपालिका–३ च्यास्मीटारमा कांग्रेसका उम्मेदवार भुपालसिं राई वडाध्यक्षमा विजयी भएका छन् । नेकपा एमालेका उम्मेदवार महेश अधिकारीलाई १७ मतले पछि पार्दै राई वडाध्यक्षमा निर्वाचित भएका हुन् ।
राईले ५६७ मत पाउँदा अधिकारीले ५५० मत पाएको निर्वाचन अधिकृतको कार्यालयले जनाएको छ । निर्वाचनमा भुपालसिंको प्यानल नै विजयी भएको छ । उनी च्यास्मीटारका पूर्वगाबिस अध्यक्ष पनि हुन् ।
२०७४ सालको स्थानीय तहको निर्वाचनमा एमालेका भलाराज राईसँग पराजित भुपालले यसपल्ट वडाध्यक्षमा बाजी मारेका हुन् । तत्कालिन कांग्रेस वडा सभापति रहेका भलाराजले टिकट नपाएपछि एमाले प्रवेश गरेर वडाध्यक्षमा विजयी भएका थिए ।
कांग्रेस वडासभापति रहेका अधिकारी पनि टिकट नपाएपछि चुनावअघि एमाले प्रवेश गरेर वडाध्यक्षमा उठेका थिए । निर्वाचनमा माओवादी केन्द्रका समशेर राईले १० मत पाएका छन् ।
