- ट्रेण्डिङ:
खोटाङको खोटेहाङ गाउँपालिकामा गाउँपालिका अध्यक्ष र उपाध्यक्षमा गठबन्धनका उम्मेदवार विजयी भएका छन् । नेकपा एमालेका उम्मेदवार कविता राईलाई हराउदै गाउँपालिका अध्यक्षमा गठबन्धनका तर्फबाट उम्मेदवार बनेका माओवादी केन्द्रका उदिमबहादुर राई र उ उपाध्यक्षमा एमालेका राजन बञ्जरालाई हराउदै नेपाली कांग्रेसका रुपेश राई विजयी भएका हुन् ।
अध्यक्षमा विजयी उदिमले निकटतम प्रतिस्पर्धी एमालेकी कविता राईलाई ३८ मतले हराएका हुुन् । उदिमले ३७२८ मत ल्याएर विजयी हुँदा कविता ३६९० मत प्राप्त गरी पराजित भएकी छन् । अध्यक्षमा पराजित एमालेकी कविता यसअघि सोही गाउँपालिकाको उपाध्यक्ष थिइन् । उपाध्यक्षमा विजयी कांग्रेसका रुपेशले ३७३७ र पराजित एमालेका राजन बञ्जाराले ३३१० मत ल्याएका छन् ।
९ वडा रहेको यस गाउँपालिकामा ६ वडामा गठबन्धनका, २ वडामा एमालेका र १ वडामा स्वतन्त्र उम्मेदवार वडाध्यक्ष निर्वाचित भएका छन् । वडा नं. १, २ र ९ मा गठबन्धनबाट माओवादीको प्यानल नै विजयी हुँदा ३ मा गठबन्धनबाट वडाध्यक्षमा कांग्रेस र वडा सदस्यहरूमा एमाले, ५ मा खुल्ला र दलित महिला वडा सदस्यमा एमाले र अरूमा गठबन्धनबाट माओवादी, ६ मा १ जना खुल्ला वडा सदस्य एमाले र अरू गठबन्धनबाट माओवादी, ८ मा वडाध्यक्षमा स्वतन्त्र र वडा सदस्यहरूमा एमालेका उम्मेदवार विजयी भएका छन् । ४ र ७ मा एमालेको प्यानल विजयी भएको छ ।
